काठमाडौं। पछिल्ला दिनहरूमा तराईका विभिन्न जिल्लामा साम्प्रदायिक सद्भाव र सामाजिक एकतामा असर पुर्याउने गतिविधि बढेपछि नेपाल प्रहरीले व्यापक निगरानी र कारबाहीलाई तीव्र बनाएको छ। यही क्रममा साउन १३ गतेदेखि शनिबार बिहान ९ बजेसम्मको अवधिमा सात जिल्लाबाट ६५ जनालाई पक्राउ गरिएको प्रहरीले जनाएको छ।
प्रहरी प्रधान कार्यालयका अनुसार पक्राउ पर्नेहरूमध्ये सबैभन्दा धेरै धनुषाबाट ४५ जना रहेका छन्। यस्तै, सर्लाहीबाट ९ जना, सिरहाबाट ५ जना, महोत्तरी र सुनसरीबाट २–२ जना तथा पर्सा र सप्तरीबाट १–१ जनालाई नियन्त्रणमा लिइएको छ।
प्रहरीले पक्राउ परेका व्यक्तिहरूमाथि सामाजिक सद्भावमा खलल पुर्याएको आरोपमा प्रचलित कानुनअनुसार अनुसन्धान अघि बढाइएको जनाएको छ। घटनासँग सम्बन्धित प्रमाण संकलन तथा आवश्यक कानुनी प्रक्रिया जारी रहेको प्रहरीको भनाइ छ।
प्रहरीले समाजमा धार्मिक तथा साम्प्रदायिक विद्वेष फैलाउने कुनै पनि गतिविधि कानुनविपरीत हुने स्पष्ट पार्दै त्यस्ता कार्यमा संलग्न नहुन सबै नागरिकलाई आग्रह गरेको छ। साथै, सामाजिक सद्भाव, आपसी विश्वास र शान्ति कायम राख्न सहयोग गर्नसमेत नेपाल प्रहरीले सर्वसाधारणसँग अपिल गरेको छ।
